- قال اجو لينا
- مين اجا ليكن؟
- هني
-ايه عرفنا انو هني. بس مين يعني؟
- ما بعرف
- ولك كيف ما بتعرف؟
- ايه، ما بعرف. ضروري يعني اعرف؟
كتير ناس اجو لينا. دخلك شي يوم عرفنا مين تحديداً؟
- سنونوتي الكحلية....
- لا، الله يخليك. هي الوحيدة يلي ما اجت، ولا يوم.
- ليش الخضرا اجت؟
- ايه.
- العمى، ووين كنت انا ما انتبهت؟
- كنت نهارتها تحديدا عم تسرق كهربا من عند ابو سامر
- يا ربي دخلك! ولك انت شو عرفك؟
- هو خبرني
- ليش هو بيعرف؟
- ايه
- وما عمل شي؟
- شو كان بدك يقوصك؟ ما عندو حل. يا اما بقوصك، او بيتسلى نتفة هو وزينة
- شووووو؟ بلا هبلك عند هل صبح
- طيب. بلاه.
- هلق عم تحكي جد؟
- اكيد لاء. من ايمتى يعني انا بحكي جد؟
- قلت بركي
- ما تقول.
- سنونويتي الكحلية....
- وشو قصتك انت وياها هيدي؟ منعرف انك مخضرم ومثقف وبتسمع زياد
- بس ما بتعرف مين اجا ليكن. يعني المعرفة ما بتحرر
- هلق ممكن تسليك شوي، المعرفة. يعني تغيير شكل.
- تغيير ضمير.
- كلام كبير هيدا.
- لا كبير ولا بلوط. ولا حتى كلام. مفقوص انا.
- عظيم. منيحة الفقصة من حين الى آخر. بس انت عطول مفقوص. شغلتك هي. يعني بظن انو لازم يبلشوا يحطو اعلانات بالجرايد "مطلوب مفقوص للالتحاق فورا بإحدى الجامعات العالمية. المواصلات مؤمنة".
- يعني شو مؤمنة؟ أولك بيعطوني تذكرة سفر؟
- بيعطوك طنجرة
- كرمال شو الطنجرة؟
- كرمال دم الشهيد.
- بشرفك ولو. مش وقتها
- مش وقت الدم؟
- مش وقت الهبل
- الوقت ما دخلو بالهبل. هو الحالة الوحيدة المحررة من التيك تاك
- هيدا بون بون ع نعنع
- وليش مش ع سوس؟
- اسآل الاميركان. قال النعنع جيد للديموقراطية وحرية التعبير.
- والسوس لاء؟
- لاء. هيدا ارهابي.
- يعني ما فيكن تشربو ع رمضان
- وشو منشرب؟ تمر هندي؟
- مين فرقانة معو شو بتشربو؟ اشربو سم. ليش اصلا، انتو كتير همكن، شو بتشربو؟ المهم ما "تشربو".
- في سهرة اليوم. عند حازم.
- وفيه شرب؟
- حرام عليك.
- يه يه.
- احترمني ولو اخي
- ما حدا علمني
- طيب خود بعين الاعتبار اني صايم
- كمان ما حدا علمني
- تاخد بعين الاعتبار؟
- شو يعني الصوم.
- بخبرك انا. الصوم هو...
- له له. ما تغلط معي، بشلّك عينيك. ما بدي اتسلى واتثقف هلق. علم الحضارات والانفتاح على الآخر مش كتير بثيروني.
- ولووووووووو. ولشو الاثارة هلق؟
- لانها متل الضمير تماما. "هنا"
- كل الوقت؟
- طبعا
- بدك تحترق وتنكوي بنار جهنم، انت.
- ايه عظيم. هي تسلاية. لكان صومك تسلاية؟
- نحنا مجبرين. الله الو حق علينا.
- بيقبل بطاقات اعتماد؟ ولاا بس بينفع معو النقدي؟
- مش رح ينفع الحكي معك انت
- ايه بس اتذكر انو جايين لينا
- لا حول ولا قوة الا بالله
- ايه هول تماما يلي جايين.
