- أي ساعة كانت دخلك؟
- ساعة شو؟
- ساعة يلي وصلنا
- ليش نحنا وصلنا؟ منيح خبرتني. الله يطمنك
- حاسس وكأن صرلي شي دهر قاعد ع هيدا الكرسي تحديدا
-هيدي الكرسي. الكرسي مرا.
- لا ولو. بيقولو : هذا الكرسي
- ايه واذا؟ ليش انت دخلك عم تعرف الهذا من الهذه، هل ايام؟ افضلك تكون الكرسي مرا، والا جد، صيتك عاطل.
- تقلت انت
- بشو؟
- بالشرب، بشو لكان؟
- ما بعرف. ليش مين بيعرف شو بيطلع معك انت. المنطق معك مش صحي ولا سليم.
- بدي فل
- الله والنبي معك
- قوم معي
- لاء. انت والله اصحاب. مش رح يمشي حالي معكن.
- ما النبي كمان هون. ما بينفعك؟
- هىء. هيداك كمان وضعو مش ولا بد.
- مزعلك بظن
- مزعلني؟ مزعل امة بحد ذاتها
- بلا تجديف. حرام عليك
- تجديف؟ شو هي؟ قلها علاقة بالشخاتير والبحر دخلك؟
-لاء.
- ايه ما بعرفها لكان. جيب غيرها.
- حل عني.
- انا حالل. بس انت مصر انك تسبح. شو بعملك انا؟
- ما قلنالك ما دخلها
- أي ساعة؟
- ساعة شو؟
- ساعة يلي وصلنا
- ما بعرف. ما انا يلي سألتك بالأول.
- عن شو؟
- عن الساعة
- ساعة شو؟
- يييييييي، ولك يلي نقبرنا على قلبنا وصلنا لهون.
- ايه ما بعرف.
- انا لحد هلق ما بعرف كيف بتحملك، وشو هو يلي بيخليني كون معك من الاساس.
- جد ما بتعرف؟
- ليش انت بتعرف؟
- شو؟
- شو يلي بيخليني طايقك
- اكيد لاء.
- ايه عظيم.
- مينو هيدا؟
- هيدا مين؟
- ما بعرف
- مش انت سألت؟
- عن شو؟
- عن مينو هيدا
- لاء
- لكان مين سأل
- ما بعرف
- شو بتعرف انت تحديدا؟
- ولا أي شي يذكر. حتى ما بعرف ليش انا هون، وطايقك. انت بتعرف؟
- لاء.
- وايمتى ممكن تعرف؟
- الله بيعلم.
- منسألو، طالما رح تكزدرو سوا
- هي بتعرفها ما هيك؟
- انو رح تكزدر مع الله؟ ايه طبعا. بتفقع انت اذا ما كزدرت معو. دخلك مهضوم شي؟
- مين؟
- الله.
- الله مهضوم؟ ما بعرف
- وكيف بتكزدر مع حدا ما بتعرف اذا مهضوم؟
- ولك حل عني بقا
- انا حالل. بس انت يلي مش فهمان شي. حدا بيكزدر مع حدا ما بيعرف اذا مهضوم؟ قال شو؟ بيصوم وبصلي. ما عم بفهم شي. عم تتخطاني انت.
- اعتراف هيدا؟
- شو هيدا؟
- انو عم بتخطاك
- طبعا
- عال. كبرت بنظر حالي. فيلسوف متل حضرتك يعترف هيك اعتراف، انجاز هيدا
دخلك، قديش الساعة؟
- ساعة شو؟
- الساعة هلق، قديش؟
- ما بعرف. بظن بشي عشرين دولار. هيك سعرتلي ياها آخر مرة.
- مين؟
- عفاف
- وشو جاب عفاف هلق؟
- ليش اجت؟ يا خاينة. وقال شو؟ فرصة هي اليوم.
- عم ضيع.
- اكتر ما انت ضايع؟
- ايه ايه، اكتر.
- هيدا شي كتير منيح وصحي وسليم، الضياع.
- بدي فل.
- ايه فل.
- وما بتقلي الله معك؟
- لا اكيد لاء. شو بدك فيه اذا مش مهضوم؟
سمير معك. سمير مش بس مهضوم، لا بل إسانس الهضمنة.
يلا صديقي، سمير معك، واتغطى منيح.
- كرمال شو؟
- ما بعرف. هي زمطت هيك.
